Guliston shahridagi «Besh tashabbus» xiyobonida Sirdaryo viloyati hokimligi, viloyat prokuraturasi va Bandlik bosh boshqarmasi tomonidan navbatdagi mehnat yarmarkasi tashkil etildi (video)
Yarmarkada Sirdaryo viloyatidagi 90 ta korxona va tashkilot 2534 ta bo‘sh ish o‘rni bilan ishtirok etdi. Bo‘sh ish o‘rinlari mehnat yarmarkasida 2000 nafardan ortiq fuqarolar qatnashdi.
— Tadbir davomida, 278 nafar ishsiz fuqaroga ishga joylashish uchun, 116 nafar kasb-hunarga o‘qish istagida bo‘lganlarga yo‘llanmalar berilib, 49 nafar fuqaro ishga joylashtirildi, – deydi viloyat Bandlik bosh boshqarmasi boshlig‘i o‘rinbosari Nurilla Mamatqulov. — Shuningdek, uzoq muddatli jazoni o‘tab qaytgan fuqarolarning 270 nafari, IIB probatsiya hisobida turuvchilar 150 nafar, afv etilganlardan 200 nafari mehnat yarmarkasida ishtirok etdi. 138 nafar fuqaroga huquqiy maslahatlar berildi.
Tadbir davomida tadbirkorlik faoliyatini boshlamoqchi bo‘lganlar uchun minitexnologiyalar, zamonaviy asbob-uskunalar taqdimotlari o‘tkazildi.
Tadbirda O‘zbekiston Respublikasi Prezidentining maslahatchisi B.Islomov, Bosh prokuror o‘rinbosari Sh.Uzoqov, Ichki ishlar vaziri P.Bobojonov, Sirdaryo viloyati hokimi G‘.Mirzayev qatnashdi.
Shuhrat Suyarov, Furqat Toshmatov (surat), O‘zA